PSNk, Geroa Baik eta Zurekin Nafarroak 2023-2027ko Gobernu Aurrerakoi eta Anitzerako Akordio Programatikoan hitzartu zuten neurrietako bat zen gaur iragarri dutena. Hala, Gimenok adierazi du «egiturazko aurrerapauso» bat dela gaurkoa, Nafarroako hezkuntza hobetzeko. Haur Hezkuntzako 0-3 zikloaren erabateko doakotasunak 3,8 milioi euroko kostua izanen du eta «3.300 familia gehiagori eginen die mesede».
Haurrak zentroetan onartzeko irizpideak ere aldatu dituzte eta Haur Hezkuntzaren bigarren zikloko onarpen arauekin berdindu dira. Hasteko, onarpena lortzeko puntuazio irizpideak aldatu dituzte, eta, aurrerantzean, lehenetsi eginen da zentroan anai-arrebaren bat izatea, zentroarekiko gertutasuna, familia unitatearen errenta eta desgaitasunen bat izatea.
Gimenok iragarritako neurri berriarekin, amaitu egin da 2021-2022ko ikasturtean Nafarroako Gobernuak hasi zuen 0-3 urteko zikloa doako bihurtzeko prozesua. Lehen ikasturte horretan %7tik %75era bitarteko deskontuak aplikatu zituzten. Hurrengo ikasturtean, 2022-2023koan, 0-3 urteko zikloa doakoa izan zen urteko errenta pertsonako 6.650 eurotik behera zuten familientzat —9.300 eurotik behera guraso bakarreko familientzat—. 2024-2025 ikasturtean familia guztiek dohainik jasoko dute zerbitzua.