Finalaurreko partidu ikusgarria, gogorra eta oso orekatua jokatu zuten. Goiuri Zabaleta 7-0 aurreratu zen markagailuan eta partidu borobila jokatu zuen. Zabaletak erakutsia zuen aurretik tantoak amaitzeko sekulako abilezia duela, baina finalaurrekoan, 14 urterekin sinestezina dirudien patxada erakutsi zuen, pilotakada bakoitza zentzuz joaz. Hala, partida luzatzeak Leire Garairi mesede egin ziezaiokeela zirudien arren, leitzarrak ez zuen beldurrik izan tantoak landu eta luzatzeko eta, eskuin fresko batekin, gasteiztarra laugarren koadroaren bueltan izan zuen. Gauzak horrela, partidaren lehen erdi luzean alde erosoak kudeatu zituen aurrelari nafarrak, 10-17 ere aurreratu zelarik.
Errazena amore ematea bazen ere, Leire Garai ez da lehenengoan errenditzen diren horietakoa eta lanean jarraitu zuen. Ahal izan zuenean aurrera pauso bat eman zuen eta, airez eta sakearekin asmatuta, Zabaletari mina egitea lortu zuen. Fisikoki ere asko gogortu zen partidari hobeto erantzun zion arabarrak eta, lanari esker, markagailua asko orekatzea lortu zuen. Behetik gora etorrita, tanto bakarrera gerturatzea lortu zuen 19 eta 20koan. Gauzak estuen zirenean, tanto oso luze eta borrokatu batean leitzarrak sakea berreskuratu eta merezitako garaipena eskuratu zuen.