Gabriel SARALEGI ARRIBILLAGA
Herri kirolei loturik egon da betidanik Gabriel Saralegi Arribillagaren izena. Aitaren eskutik, oso gaztea zela hasi zen herri kirol munduan. Aizkoran lehenbizi, esatari, irakasle eta antolakuntza lanetan, gero. Herri-kirolaren adar guztiak landu dituela esan daiteke. Leitzan egin diren herri kirol jaialdi, desafio eta probak ia guztien atzean dago Saralegi. Eta ez herrian bakarrik, nazioartean ere ibili da herri kirola zabaltzen. Herri kirolek etorkizuna izan dezaten, gaztetxoei herri kirolak erakusten ari da Leitzan.
Juan BARRIOLA BARAIBAR
Zizurko Ardoi Pilota Elkartean hogeita bost urte baino gehiago daramatza boluntario lanetan Juan Barriola Baraibarrek. Leitzatik Zizurrera bizitzera joan zenean hasi zen bertan esku bat botatzen eta hasierako ilusio berarekin segitzen du lanean. Entrenatzaile, epaile, botilero... denetarik egitea suertatzen zaio. Ardoi Pilota Elkartea sortu duten taldean dago bere ustez arrakastaren giltza eta horregatik nabarmendu nahi izan du, «talde guztiaren meritua» dela sari hau.