Leitza eta Aresoko produktuen azoka eta azienda erakusketa egin zituzten igandean Leitzan. Goizeko hamarretan hasi zen azoka eta aziendak izan ziren lehenbiziko momentuan protagonistak. Peritza aldameneko estratatatik egin zuten plazarako bidea behorrek, zaldikoek, pottokek, ahuntzek, ardiek... eta nobedadeak erakarrita, asko izan ziren momentu berezi hori ikustera hurbildu zirenak. Behin plazara ailegatuta, behien, txekorren, piztien eta hegaztien aldamenean, txukun jarri zituzten guztiak. Ehun buru baino gehiago bildu zituzten azienda erakusketan.
Horiekin batera, Leitza eta Aresoko hemeretzi baserritarren produktuak erosi eta dastatzeko aukera izan zuten azokara hurbildu zirenek: barazkiak, sagarrak, sagardoa, eztia, gazta, fruitu lehorrak, txerrikia, ogia, gozoak, taloak...
Aurtengo azokako beste berrikuntza, bertako haziekin osatutako postua izan zen. LeitzEko kontsumo taldeko hainbat kide baserriz baserri ibili dira eta bertako haziak bildu eta elkarrizketak egin dituzte. Jasotako hazietako batzuk jarri zituzten ikusgai eta nahi zuenak haziak hartzeko aukera izan zuen.
Ohikoa denez, eguerdi partean bildu zen jende kopururik handiena baina antolatzaileak pozik zeuden aziendak plazara eramateko momentuak erakarrita, goizean goizetik mugimendu gehiago nabaritu zelako.
