Erleta eskolako haur eta gaztetxoen laguntza izanen dute gurasoek plaza dotore-dotore jartzeko orduan. Hosto lehorrak, pinaburuak, ezkurrak, morkotsak, makila txikiak... hartuta, udazkenarekin harremana duen artelan txiki bat osatzeko eskatu zaie. Plaza eta karrapean jarriko dituzte guztiak ikusgai. Gau beltzari ere keinu egin nahi diote eta herritarrei etxeko arropa zaharrak eta maindireak eramateko eskatu diete, plazan eta karrapean zintzilikatzeko.
Gaztaina erreak banatzen 17:00etan hasiko dira eta zertxobait lehenago jarriko dute danbolina dantzan. Gurasoek momentuan erreko dituzte gaztainak. Sei gaztaina errez betetako poltsa 50 zentimoren truke banatuko dute. Musikarik ere ez da faltako eta iluntzera arte dantzan aritzeko aukera izanen dute bertaratzen direnek.