Dagoeneko Sarai Roblesek, Julio Sotok eta Joanes Illarregik eskuratu dute finalaurrekoetan aritzeko txartela, Iruritako, Vianako eta Uharteko saioak irabazita, hurrenez hurren. Leitzako irabazlea zuzenean gehituko da zerrendara eta lau hauekin batera, sailkapenaren arabera, beste hamalau bertsolarik izanen dute hurrengo fasera pasatzeko aukera.
Azaroaren 4an emanen zaio hasiera finalaurrekoen faseari, egun horretan Altsasun jokatuko den saioarekin. Beste bi saio ere izango dira, azaroaren 11an Agoitzen eta 19an Lesakan. Horietan erabakiko da finalean ariko diren zortzi bertsolarien zerrenda. Abenduaren 2an jokatuko da finala, Iruñeko Anaitasuna kiroldegian.