2023ko Euskal Herriko hirugarren mailako aizkolarien bigarren kanporaketa jokatu zuten igande arratsaldean Zizurkilen. Pronostikoak bete eta Julen Alberdi Txikia IV.ak, Mikel Larrañagak eta Ugaitz Mugertzak lortu zuten finalerako txartela. Lehenbiziko kanporaketan finalerako txartela lortu zuten Eneko Otaño, Aitzol Atutxa eta Eneko Saralegirekin batera ariko dira finalean.
Zizurkilgo kanporaketan launa kanaerdiko moztu behar zituzten aizkolariek. Txikia IV.ak 7 minutu eta 11 segundo aski izan zituen lana burutzeko, Mikel Larrañagak 7 minutu eta 24 segundo eta Ugaitz Mugertzak 7 minutu eta 56 segundo. Finaletik kanpo gelditu ziren Ibai Soroa (8.18), Asier Pellejero aresoarra (9.02), Jexux Mari Mujika (9.20), Eloy Corchero (10.05), Ioritz Gisasola (10.06), Julen Kañamares (10.41), Xabat Olaizola (12.49), Miguel Martín (14.06), Urtzi Olasagasti (14.11) eta Hermenegildo Herrero (18.39).