Ados pilota elkarteak hirugarren aldiz antolatutako Plazaz Plaza txapelketako bigarren finalerdia irailaren 23an jokatuko dute Etxaurin Goiuri Zabaleta leitzarrak eta Mujikak, Ibarrola eta Orbegozoren kontra.
Bi aurrelari gazte aurrez aurre izanen dira larunbatean, esperientzia handia duten atzelarien gidaritzapean. Etxauriko plazaren berezitasuna (ezker paretarik gabe) erabakigarria izan daiteke. Irabazleek, Iturriaga eta Ruiz de Larramendi izanen dituzte esperoan irailaren 30ean Azkoitiko Goiko Losa pilotalekuan jokatuko den finalean. Beraz, Zabaletak garaipena lortuko balu, Leitzako bi aurrelari izanen lirateke aurrez aurre finalean: Iera Agirre Iturriaga beteranoa eta Goiuri Zabaleta Rodriguez gaztea.