Asteburu honetan ere festa giroa izango da Areson. Lagunartekoek, sanpedroen aitzakian, ekainaren 30erako eta uztailaren 1erako egin dute proposamena.
Ekainaren 30ean, ostiralean, 17:30ean, meza izango da eta irteeran merienda eskainiko dute. Gero, 18:30 aldera, herriko eskea egingo dute Lagunartekoek eta gauean Lagunartekoen afaria izango da.
Egun osoko festa larunbatean
Larunbatean herritar guztiak izango dira festaren parte. Goizean elkartean gosalduta indarrak hartu eta, baserrietarako bidea egingo dute gazteek. Ateak zabalik esperoan egongo dira bizilagunak jan-edanak eskaini eta trukean kantu, dantza eta kontuak jasotzeko. 18:30ean sagardo dastaketa antolatu dute plazan. Lau euro ordaindu beharko da edalontzia eta nahi adina edateko aukera izango da.
Gauean, 21:00etan, herri afaria izango da Pake Toki elkartean. Menua: sarrerakoak, entsalada, oilaskoa patatekin, postrea, kafea eta kopa. Afarirako txartelak Sastinean izan dira salgai ekainaren 26ra arte.