Goizuetako Umore Ona pilota elkartea Espainiako klub arteko pilota txapelketan bigarren mailako azken fasean ariko da, bere multzoko buru izan ondotik. Larunbatean Barañainen bi partidetako bat irabaztea aski zuen sailkatzeko, baina biak irabazi zizkion Lagunak-i.
Buruz burukoan, Umore Onako Egigurenek 10-8 eta 10-3 irabazi zion Lagunak-eko De la Torreri eta binakakoan, Umore Onako Beñat eta Antton Apezetxeak 10-7 eta 10-2 irabazi zieten Lagunak-eko Senosian eta Taintari.
Finalerdiak Soriako Covaledako Urbion B klubaren kontra
Agoizko Toki-Eder pilotalekuan jokatuko da azken fase hori asteburuan. Umore Onarekin batera, Lizarrako Izarra, Logroñoko Titin III eta Soriako Covaledako Urbión B taldeak sailkatu dira. Larunbatean 10:00etan hasiko dira finalerdiak, Izarra eta Titin IIIeko pilotarien arteko buruz buruko partidarekin. Bigarren partidan, buruz buru ariko dira Urbion B eta Umore Onako pilotariak. Hirugarren partidan binaka ariko dira Lizarra eta Logroñoko klubetako bikoteak eta ondotik, binaka, Goizueta eta Covaledakoak. Irabazleek finalak jokatuko dituzte igandean.