Anikote Leitzako Udal Kiroldegiak, Denok Bat Leitzako guraso elkarteak eta Kaxkabeltza Leitzako merkatarien elkarteak antolatuta egin zuten abenduaren 31ko lasterketa. Bederatzi urtez azpikoak izan ziren aurrenekoak eta 600 metro egin zituzten; hamar eta hamabost urtekoek 2.000 metro egin behar izan zituzten eta hamasei urtetik gorakoek 4.000 metro.
Sailkapenik ez zen izan, baina parte hartzaile guztiek jaso zuten oparia, baita mozorrorik hoberena zuenak ere. Horrez gain, Kaxkabeltzakoek 50 euroko lau bonu zozketatu zituzten parte hartzaileen artean. Leitzako Aurrera elkarteak, berriz, Osasunaren futbol partidarako bi sarrera eman zituen eta haurren mozorrorik hoberenarentzat izan ziren.