Urteko azken ostirala berezia izatea nahi zuen Leitzako Sarek, eta helburu horrekin antolatu zuen abenduaren 30eko hitzordua, olerkariak, irrintzilariak, harri jasotzaileak, abesbatzakoak, dantzariak, bertsolariak... gonbidatuz. Guztien artean osatu zuten Etxera bidea gertu ekitaldia. Hainbat bideo ere pantailaratu zituzten eta herriko preso ohi bat eta preso baten senide bat ere jarri ziren mikrofono aurrean. Hunkigarriak izan ziren beraien hitzak.
Urte berrian sartuta, larunbatean Bilboko kaleak hartuko dituen manifestazioan jarria du orain begia Leitzako Sarek. Hara joateko deia egin die herritarrei. Leitzatik Bilboko manifestaziora joateko autobusak antolatu dituzte, eta izena ilbeltzaren 4a baino lehen eman beharko da Maimurren, Astizen eta Torrean.