Dokumentala estreinatu aurretik, LHL erronkako lantaldeko haurrek egin zuten sarrera eta Manex Morenok ere hitz batzuk egin zituen. Dokumentala ikusi ondoren, ikusleak ere pozik gelditu ziren, eta LHLko Oihana Amundarainen hitzetan, «'emozio' hitza entzun zen jendearen ahotan, eta mezua zein argi emana zegoen azpimarratu zuten bereziki». Bestalde, «Manex jende askok zoriondu zuen egindako lanagatik». Eta LHL lan taldea ere «oso pozik» gelditu da.
Izan duen erantzunaren seinale, dagoeneko dokumentala beste herri batzuetara eramateko eskaera jaso dute. Besteak beste, Betelukoek egin diete gonbidapena. Aurkezpenean, LHLren lekukoa hartu duten Segurako ordezkariak ere izan ziren, baita kirol egokituan aritzen den Kemen elkarteko kideak ere.