.JPG)
Hemen da Goizuetako ospakizunen egutegian seinalatutako azaroko hitzordua: Feria Eguna. Azaroaren 26an eginen da azienda, artisau eta nekazaritza feria eta aurtengoa XVIII.a izanen da.
Larunbatean 10:00etan emanen diote ofizialki feriari hasiera. Ordu horretatik aurrera aziendak eta postuak ikusgai eta salgai izanen dira bazkalordura bitarte. Joaldunak eta trikitilariak ere ibiliko dira eta 12:00etan toka txapelketa hasiko da.
14:30ean bazkaltzeko bilduko dira. Bertako babarrunak, betizu gisatua eta postrea izanen dituzte bazkaltzeko eta txartelak Amaia kafetegian eta estankoan eros daitezke. Helduenak 22 eurotan, ikasle eta langabeenak 18 eurotan eta 9 eta 16 urte bitartekoenak 11 eurotan daude; 8 urtetik beherakoenak doan.
Antolatzaileek Feria Egunean baserritarrez jantzita joateko deia egin dute.