Mikel Zabaleta alkateak aurreratu duenez, «800 lagun baino gehiago» bilduko dira, «estalpea eta gainerako moldaketak beharrezkoak izan diren erakusle». Amazabal institutuko ikasleak eta irakasleak, Erleta eskolak ikasleak eta irakasleak, eskolako eta institutuko guraso elkarteko kideak eta udal ordezkariak elkartuko dira.
750 metro koadro inguruko estalpe argiztatua eraiki dute (38x20 m), eta horrez gain, oztopo arkitektonikoak ezabatu dituzte lehen eskailerak ziren tokietan aldapak eginez. Bi futbol zelaiak berritu eta pintatu dituzte eta kirolerako elementu berriak jarri: lau kanasta, sarea boleibolean jokatzeko... Horrez gain, bi zelaietako lurra leundu eta pintatu dutenez, patinekin ibili nahi dutenek erabil dezakete. Estalpearen ondoan argi koadro bat ere jarri dute, ekitaldiren bat baldin bada eskura izateko.