Ehun urteko hiru lagun
Maria Arotzena ez zen 1992. urtean ehun urteko muga gainditu zuen goizuetar bakarra izan; 1892an jaio ziren hiru goizuetarrek bete zituzten ehun urte: Mitxelkoko Mariak, Donfermineneko Jaxinta Eskuderok eta Muxurdinbordako Maria Apezetxeak. Eta urte hartan udalak hirurak izan zituen gogoan, oroigarri bana emanez.
Oso bestelako osasun egoerarekin ailegatu ziren ehun urteak betetzera. Jaxinta, esaterako, ohean zegoen. Apezetxea, ordea, oinez Kuxinene baserrira joaten omen zen kafea hartzera. Eta Arotzena, gurpil aulkian zegoen ordurako, baina osasun harrigarria zuen. Eta zein ote zen sekretua? Bada kontatu zuenez, «ehun urtetara ailegatzeko arrazoietako bat pattarrak ematen duen bixigarritasunean dago». Egunean hiru tragoxka edaten omen zituen.
Maria amaren lekukoa Florentina alabak hartu du
Maria eta Paulok hamabi seme-alaba izan zituzten, eta horietako bat, Florentina, da orain mendea beteko duela. Alaba bat, biloba bat eta bi birbiloba ditu eta urte mordoxka omen ditu Mitxelko baserritik herrira etorri gabe. Hala ere, herria ikusteko gogotsu dago eta Oxeguarda jatetxean bere ingurukoekin ospatu nahi du bere urtebetetze egun berezia bihar. Ez dira egunero betetzen ehun urte, eta dudarik gabe, bada ospatzeko nahiko motibo. Zorionak!