Leitzak gizarte larrialdi kasuetarako etxebizitza bat izanen du herriko familia baten dohaintzari esker

Ttipi-Ttapa 2022ko abu. 8a, 20:00
Orain arte Leitzan ez zegoen baliabide bat eskura jarri du Aleman familiak.

Leitzako Aleman familiak udalari pisu bat dohaintzan ematea erabaki du, etxebizitza hori gizarte larrialdi kasuetan erabiltzeko baldintzarekin, hau da, «premia larriko kasuetan behin-behineko etxebizitza izateko, hala nola, errefuxiatuentzako, indarkeria matxistaren biktima diren emakumeentzako, etxegabetze kasuetarako, ohiko etxebizitzen erreketa edo suntsiketa kasuetarako eta abarretarako, edo bestelako gizarte edo asistentzia zerbitzuetarako».

Honela, duela gutxi hil zen senide baten pisua premia larrian dauden pertsonentzako eta familientzako behin-behineko konponbide gisa erabili ahalko da, orain arte Leitzan ez zegoen baliabide bat eskura jarriz.

Leitzako udalak, bere aldetik, biziki eskertu dio familiari egindako ekarpen eskuzabala eta datozen hilabeteetan Gizarte Zerbitzuen Mankomunitatearen esku utziko du haren erabilera, hark gizarte larrialdietarako etxebizitza gisa arautu eta egoki kudeatu dezan.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun