Ikus-entzunezkoetan murgilduta
«Praktikak egiten nituen lekuan bideo bat egitea egokitu zitzaidan», eta hor hasi zen bere zaletasuna. «Gero, dronea erosi nuen eta irudiak muntatzen autodidakta moduan gauzak ikasiz joan naiz». Bideoak egiten dituen bitartean, «denbora azkar pasatzen dela» dio Etxeberriak, «eta gero emaitza ikusteak satisfazio handia ematen dit». Gainera, jendeak bideoak «asko eskertzen dituela» dio, «eta horrek jarraitzera animatzen nau».
Orduak sartu beharra
Autodidakta izan da Etxeberria, bere kabuz ikasi du bideoak grabatzen eta editatzen. «Egia esan, menperatzen hasteko ordu dezente sartu behar dira ordenagailuaren aurrean». Interneta izan du irakasle; «behartu ahala Youtuben begiratu izan dut gauzak nola egin ditzakedan, egia esan denetarik dago bertan».
«Jendeak bideoak asko eskertzen ditu eta horrek jarraitzera animatzen nau»
Gehien egiten dituen bideoak «dronearekin paisaiak erakusten dituztenak» dira, horiek baititu gustukoenak. «Izan ere, beste perspektiba bat ematen digu droneak». Goizuetako eta inguruko hainbat leku erakutsi ditu txorien ikuspuntutik, dronearen bitartez. «Tramankulu berriak betidanik gustatu izan zaizkit, eta bat erosi nuen probatzeko».
Erabiltzen ikasi zuenean, «herriko hainbat txoko erakutsi nahi izan nituen bertze perspektiba batetik», hori baita bere helburua «herria eta ingurua grabatzea eta ezagutaraztea». Dronea erabiltzea «nahiko erraza» dela dio Etxeberriak, «pixkanaka hasiz segituan hartzen da trukoa. Irrati kontroleko auto bat gidatzea bezela da, baina hau airean ibiltzen da».
Youtube eralkusleiho
«Noizean behin, norbaitek eskatuta», modu profesionalean aritu da bideoak egiten, «baina ez naiz profesionala». Horren ordez, nahiago du bideoak grabatu, editatu eta bere Youtubeko kanalean (Iñaki Etxeberria) publikatu.
«Erakusleiho ona» dela dio, «nahiko kalitate onean geratzen dira bideoak eta denbora bat pasatuta ere jendeak oraindik ikusten jarraitzen du. Hala ere, Facebook-en automatikoki erreproduzitzen hasten dira eta oihartzun gehiago lortzen da bertan».
Etorkizunera begira, Etxeberriak argi du; «zerbait grabatzeko gogoa edo inspirazioa etortzen zaidanean, grabatu eta bideoak egiten jarraituko dut. Gehiago eginen nituzke, baina denbora librea behar izaten da horretarako».