Leitzan Energia Berriztagarrien Komunitatea sortzeko lanean ari den lantaldeak aurkezpena eginen du ostiralean

Ttipi-Ttapa 2022ko mai. 4a, 17:00

Energia Berriztagarrien Komunitatea sortzeko bidea abiatu du Leitzako herritar talde batek, Leitzako Udalaren eta Goiener kooperatibaren laguntzarekin. Herrian dauden baliabide energetikoak aztertu, beharrak identifikatu eta epe motz, ertain eta luzerako helburuak finkatzeko, ostiralean aurkezpen irekia eginen dute Herri Aretoan.

Herritarrak eta herriko erakundeak bildu nahi dituzte Energia Berriztagarrien Komunitatearen baitan, «publikoak zein pribatuak elkartuz, energia sektorearekin zerikusia duen edozein jardueratan lankidetzan aritzeko asmoz». Gisa honetara, «bertako kideei edo tokiko komunitateari zerbitzuak edo bestelako onura sozioekonomikoak eta ingurumenarekin lotutako onurak eman» nahi dizkiete.

Aurkezpen irekia ostiralean

Ostiralean 19:00etan Leitzako Herri Aretoan eginen dute aurkezpen irekia. Eta aurreratu dutenez, «ondoren edonork izanen du hausnarketa prozesuan, Energia Berriztagarrien Komunitatearen sorreran eta aurrerantzean garatuko diren proiektuetan parte hartzeko aukera».

Egin nahi duten aurreneko proiektuaren berri ere eman dute. Udal kiroldegian autokontsumo fotovoltaiko partekatua instalatu nahi dute. «Bertan sortuko den energia udal eraikinen eta parte hartu nahi duen edozein herritarren edo enpresen artean kontsumitzeko aukera izanen da».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun