80 haur eta gaztetxo hasiak dira Leitzako futbol campusean

Iker Bengoetxea eta David Delgado leitzarren bitartez, bigarren aldiz futbol campusa antolatu du Aurrera Kirol Elkarteak, eta bigarren edizio honek ere arrakasta bikaina izan du: bost eta hamabi urte bitarteko 80 neska-mutiko apuntatu dira. Futbolari ohiak eta futbolzaleak dira biak, Bengoetxea Aurreran eta Txantreako taldean hirugarren mailan aritutakoa, eta Delgado Osasunan, Eguesibarren, Peña Sporten eta Alfaro taldean bigarren B mailan ibilia. «Leitzan haurrentzat futbolarekin lotutako zerbait antolatzeko gogoa aspalditik» zutelako hasi ziren «proposamena garatzen».

Eguberrietan egin zuten estreinaldia, «Karlos Agirre Aurrera Kirol Elkarteko presidentearen laguntzarekin. Udalak, Anikote kiroldegiak eta eskolak ere dena erraztu ziguten». Pandemia tarteko, positiboak gora eta behera, ibili baziren ere, «bukaeran oso pozik gelditu ginen. 43 haur apuntatu ziren, gustura ibili ziren eta gu ere bai».

Aste honetan lau egunez

Eguberrietan hasitako bideari segida eman nahi izan diote egunotan. Hortaz, azken orduko aldaketarik ez bada, apirilaren 19tik 22rako goizak futbol campuserako dituzte. Aldi honetan ere, Aurrera elkartearen bitartez egin dute, baina adin tartea zabalduta: «Eguberrietako campusa sei eta hamabi urte bitartekoentzat egin genuen, eta kasu honetan lau eta bost urtekoentzat hiru orduko saioa antolatzen ahal genuela pentsatu genuen; sei eta hamabi urtekoentzat, berriz, 09:00etatik 14:00etara». Erantzuna espero baino hobea izan da: «Ezusteko handia izan da, ez genuen halakorik espero».

Gehienak leitzarrak

Lau urtekoetan inor apuntatu ez bada ere, bost urtekoetan sei haur apuntatu dira; sei urtekoetan bederatzi; zazpi urtekoetan zortzi; zortzi urtekoetan 21; bederatzi urtekoetan sei; hamar urtekoetan hamar; hamaika urtekoetan sei eta hamabi urtekoetan hamalau. «Bat edo beste Aresokoa, Lekunberrikoa eta Ultzamakoa bada ere, gehien-gehienak leitzarrak dira». Adinaren arabera, bost talde osatu dituzte eta talde bakoitzak bere monitorea du, Delgadok argitu duenez, «denak leitzarrak». Horrez gain, «bi lagun koordinazioaz arduratuko dira».

Saioak kiroldegian, frontoian eta eskolako gimnasioan egitekoak dituzte, eta alderdi teorikoa pixka bat lantzeko kiroldegiko ispiluen gelan biltzekoak dira. 11:00etan, berriz, atsedenaldia, «eskolako jantokian gosari osasuntsua egiteko». Horrez gain, «futbol campusean parte hartzen dutenei asegurua eginen diegu eta oparia jasoko dute». Delgadok esan duenez, «baloiaren bueltan ibiliko dira, baina horrekin batera psikomotrizitatea, koordinazioa, alderdi sozioafektiboa, kooperazioa… landu nahi ditugu. Futbolaren bitartez harreman onak sustatu nahi ditugu».

Hori guztia egin ahal izateko, «Karlos Agirreri, udalari, eskolari eta Anikoteri eskerrak» eman nahi izan dizkie: «beraiengatik izan ez balitz, ez bailitzake futbol campusa aurrera aterako». Eta elkarlanean segitu nahi dute, «udan, Eguberrietan eta Aste Santuan» campusari segida eman nahi baitiote.

Belar artifizialeko zelaia

Delgadoren hitzetan, «belar artifizialeko futbol zelaia» izatea dute beste erronka nagusia, futbolean «instalazio egokirik ez izatea muga» baita bere irudiko. Hori begiz jota, «komisio bat» sortu omen dute, «belar artifiziala duen futbol zelai bat sortzeko proiektua lantzeko».

Bide beretik, «gaur egun Aurrerak dituen erregionaleko eta kadeteen mailako futbol taldeez gain, eta areto futboleko taldeak mantenduz, ahalik eta kategoria gehienetan futbol taldeak atera nahi ditugu etorkizunean». Bestela esanda, «futbolari bultzada eman nahi diogu».