Aldaberen partida izan zen gakoa. Txapelketako erremontistarik onena izan da eta finalean ere bere nagusitasuna erakutsi zuen. Gainera, Oier Apezetxeak ederki lagundu zuen. Goizuetarrak lau partida jokatu ditu profesionaletan eta laurak irabazi ditu. Horrek txapela lortzera eraman du.
Aldabe erasokorrago aritu zen eta horri esker bideratu zuten finala. Loitegirekin alderatuta tanto kopuru bikoitza egin zuen. Loitegi eta Zaldua saiatu ziren, baina ezin izan zuten txapela irabazi. Partida berdinduta hasi zen. Bizia eta polita izan zen hasieratik bukaerara. Bosna eta seina berdindu eta gero gorriak aldegin ziren markagailuan 14-6. Hala ere, urdinek erreakzionatu eta hemezortzina berdindu zuten. Lehia gogorra zen eta 23nako berdinketa eta gero, gorriek berriz ere ihes egin zuten, 29-23. Sei tantoko abantaila hori erabakiorra izan zen. Sei tantoko aldea mantentea lortu zuten 32-26, 34-28 eta 35-29.
Aldabek 20 tanto egin eta bost pilota galdu zituen eta Loitegik berriz bederatzi tanto egin eta bost pilota galdu zituen. Hamaika tantoko alde erabakiorra bata eta bestearen artean.
Loitegi jokaldiak eginez hasi zen eta tanntoak eginez, baina pixkana itzaltzen joan zen. Aldaberi asko lagundu zion Apezetxeak eta denetarik egin zuen. Erasoan eta defentsan ongi aritu zen.
Atzelarien borrokan Zalduak oso ongi jokatu zuen, baina Apezetxeak ez zuen hutsik egin. Sakearekin biak ere zazpina tanto egin zituzten eta akatsetan ere pareko zenbakia izan zuten, pilota bakarra galdu baitzuten. Piloteoan Zalduak zazpi tanto egin zituen eta Apezetxeak bi. Defentsan ederki aritu zen Apezetxea eta pilota zailak ekarri zituen atzetik.
Merezitako garaipena lortu dute txapelketan Aldabe eta Apezetxeak partidurik galdu gabe.