13/13 auziko epaia salatu dute Leitzan

Ttipi-Ttapa 2022ko api. 4a, 13:00
Joan den ostiralean Leitzan egindako elkarretaratzea.

Espainiako Auzitegi Nazionalak espetxe zigorrak ezarri dizkie 13/13 auziko lau auzipeturi eta hori salatzeko elkarretaratzea egin zuten ostiralean Leitzan. Epaia «herri honen etorkizunaren aurkakoa» dela adierazi zuten, «herritarren gehiengoa egiten ari den elkarbizitza eta bakeranzko bidearen aurkakoa» dela, hain zuzen.

Arantza Zuluetari zazpi urte eta erdiko espetxe zigorra jarri diote, Jon Enparantzari lau urteko zigorra, Naia Zuriarraini hiru urte eta sei hilabetekoa, eta Iker Sarriegiri hiru urte eta egun batekoa. Ostiralean Leitzan adierazi zutenez, «bi helburu» ditu zigorrak: «epaitutakoen eta euren senideen zein lagunen sufrimendua areagotzea eta Euskal Herriarentzat konponbide demokratikoa oztopatzea».

Epaia salatzeko akusatuen herrietan sortutako sostengu plataformek apirilaren 9an Donostian eta Bilbon manifestazioak deitu dituzte, eta ostiralean Leitzan bildutakoek manifestazioetan parte hartzeko deia egin dute. «Bi manifestazioak 17:30ean hasiko dira, Donostiakoa Saguesetik eta Bilbokoa Jesusen Bihotza plazatik».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun