Urrian egitekoa zen parte hartze prozesua atzeratu behar izan zuten, baina berriz ere esku artean dute. Biharko saiorako hiru hizlari gonbidatu dituzte: Iban Urdanpilleta (Tolosaldeko Ataria), Alaitz Aizpurua (Noaua!) eta Igor Astibia Hekimeneko kidea. Herri Aretoan izanen da, 18:30ean.
Beste hiru saio
Martxoaren 24an diagnostikoa egin, helburua zehaztu eta izaera eta balioak adostu nahi dituzte. Apirilaren 7an proiektuaren ezaugarriak landuko dituzte eta maiatzaren 2an proiektuaren kudeaketa izanen dute hizpide. Saio hauek ere Herri Aretoan izanen dira, 18:30ean.
Helburuak
Egitasmo honen bitartez, «euskararen normalizazioan pauso bat harago» joan nahi dute bultzatzaileek, «kalitatezko informazioa helarazi» eta «herri atxikimendua areagotu».
Leitzatik Leitzara egindako proiektua izan nahi du. Alde batetik, paperean «kazetaritza pausatua» egin nahi dute, edizio digitalean «eguneroko albisteak» sartu nahi dituzte eta sare sozialetan «dinamika propioak» landu nahi dituzte. «Dauden komunikabideen osagarri eta haiekin elkarlanean» ari nahi dute.