Aranoko Maisueneko sarbideak itxura berria hartuko du laster, Nafarroako Gobernuaren dirulaguntzarekin arrapala egokitzen hasi baita udala. Otsail bukaeran hasi zituzten lanak, eta Joxan Ruiz alkatearen arabera, «gutxi gorabehera hiru bat astez luzatuko dira».
Maisuenean biltzen diren jubilotekako lagunek egin zioten udalari eraikineko sarrera egokitzeko proposamena, adinekoei sarbidea errazte aldera. Horretarako dirulaguntza eskatu zuen Aranoko udalak. Nafarroako Gobernuko Toki Administrazioko Departamentuan 22.384,42 euroko aurrekontua (BEZa kanpo) aurkeztu zuen udalak eta gobernuak 15.068,14 euroko laguntza onartu du (BEZa kanpo).
Plazatik Maisuenerako bidean dauden hasierako eskaileren tokian, ezkerreko aldetik, hau da, paretaren aldetik, arrapala eraikiko dute. Bukaerako zatian ere ezker aldetik izanen du arrapalak segida. Hortaz, obra hauek egin ondoren ere, eskailerak hor mantenduko dituzte. Irisgarritasuna hobetzeko bidean beste pauso bat.