Datorren igandean jokatuko da Azkoitiko Gurea pilotalekuan Emakumezkoen binakako Eusko Label txapelketaren finala, eta protagonista izanen diren zortzi pilotariak Azkoitian izan ziren astearte arratsaldean materiala aukeratzen. Final nagusian Iturriaga leitzarra eta Egaña eta Zelaia-Lopez bikoteak lehiatuko dira. Promozio mailan, berriz, Rodriguez leitzarra eta Mondragon II.a, Santos eta Urrizaren kontra ariko dira.
Pilota aukeraketan eta igandeko finalen aurkezpenean bidelagun izan zituzten emakume pilotariek Javier Zubizarreta Azkoitiko alkatea eta Angel Martin Kiroletako zinegotzia.
Frontoiak emakumeenak ere badirela erakusteko jaio zen Ados Pilota eta Emakumezkoen binakako Eusko Label txapelketa da emakume pilotari profesionalen klubak antolatu duen lehen txapelketa handia.
Sarrerak salgai
Finalerako sarrerak eros daitezke ondorengo loturan sartuta https://www.ticketself.com/event/bc817b8e/entradas-eusko-label-binakako-txapelketa-ados-pilota edota Azkoitiako udaletxean, Herritarren Arreta Bulegoan. Egunean bertan, leihatilan ere erosi ahalko dira sarrerak. Finalak zuzenean emanen ditu Euskal Telebistak.