Leitzako udalak 3,1 milioi euroko aurrekontua onartu du 2022rako

Erleta eskolako eremuan estalpea egiteko eta inguru berean beste hainbat hobekuntza egiteko 394.000 euroko laguntzako jasoko du Leitzak.
Leitzako Udalak 3.098.924 euroko aurrekontua onartu du 2022rako. Aurreko urtearekin konparatuta, aurtengoa % 13 haziko da. «Bizitzen ari garen egoera zaila izan arren, lortu diren diru laguntzei esker, hainbat inbertsio eta berrikuntza egin ahalko dira herrian datozen hilabeteetan», adierazi du Mikel Zabaleta alkateak.

 

Aurten aurreikusita dauden inbertsioei dagokienez, 474.000 euroko inbertsioa eginen da, institutuaren parean dagoen futbol-zelaian argiztatutako estalpea egiteko. Horrez gain, beste bi eremu hobetu dira, eta hainbat jarduera egingo dira eremu horretan, irisgarriagoa izan dadin. Horretarako, EH Bilduren eta Foru Gobernuaren artean negoziatutako zuzenketen ondorioz, Nafarroako Aurrekontu Orokorretan 394.000 euro sartu dira proiektu horretarako. Egitasmoa gauzatzeko, Leitzako Udalak eta Nafarroako Gobernuak lankidetza hitzarmena sinatuko dute eta udalak 80.000 euroko ekarpena eginen du.

Mimukai, tokiko garapen proiektuari bultzada berria

EH Bilduren eta Nafarroako Gobernuaren arteko aurrekontu akordioan 175.000 euroko dirulaguntza ere jasotzen zen, Mimukai proiektuaren lehen faserako. Hala, bulego-gune bat prestatuko da, eta, bertan, coworking zentro bat, garapen agenteen bulegoak, autonomoentzako eta enpresa txikientzako bulegoak, prestakuntza-gela homologatu bat, bilera-gelak eta info-energia gune bat egongo dira. «Leitzako Udalak eta Cederna Garalurrek sustatutako proiektua da, gure eskualdea osatzen duten gainerako udalerrien partaidetza eta babesa duena», nabarmendu du alkateak. «Udala arduratuko da espazio egokia bilatu eta erosteaz, eta Cederna Garalurrek zentroa dinamizatzeaz arduratuko den pertsona bat izango du eskura», aurreratu du.

 

Era berean, toki-garapena bultzatzeko, Plazaolako geltoki zaharreko lursailaren lagapena lortu ondotik, 7.300 euroko partida bat bideratuko da aurreproiektu tekniko bat eta bideragarritasun plan bat idazteko, etorkizunean aterpetxe bat, taberna-kafetegi bat, turismo-informaziorako gune bat eta bizikletak alokatzeko zerbitzua duen tailer bat egokitzeko.

Mendiko bideak hobetzeko 120.000 euroko inbertsioa

Bestalde,  bideak hobetzeko 120.000 euroko inbertsioa aurreikusten da aurten, eta % 50 inguru Nafarroako Gobernuak diruz lagunduko du. «Leitzalarrea eta Sorogain inguruetan abeltzainek eta herritarrek gehien erabiltzen dituzten bideetako batzuk egokituko dira», aurreratu du Zabaletak.

Kultur programazioa osatzeko 40.000 euro

Kulturari dagokionez, aurrekontuan 40.000 euroko partida aurreikusten da Leitzako Herri Aretoaren kultur programazioa osatzeko. «Leitza laster sartuko da Nafarroako Antzoki Sarean, horretarako behar diren baldintza guztiak betetzen baititu gaur egun», aurreratu du alkateak.

Udalaren zorra urtetik urtera txikiagoa da

Bukatzeko, Leitzako Udalak duen zorpetze-mailak beheranzko joerarekin segitzen du beste urte batez. «2021. urtea 560.000 euroko zorpetzearekin amaituko dugu –dio alkateak–, hau da, sarrera guztien % 18arekin».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun