Ohi baino ekintza gutxiagorekin, baina, Umore Ona elkartearen atalen eguna ospatuko dute larunbatean Goizuetan. 11:00etan emanen diote hasiera egunari. Frontoian Umore Ona pilota eskolako kideen arteko partidak izanen dira.
Bazkalostean izanen du segida egunak. 17:30etan herriko plazan emanaldi berezia eskainiko dute Umore Ona dantza taldeko kideek abesbatzaren laguntzarekin. Koronabirusak eragindako etenaldiaren ondotik, lehen dantza emanaldia du taldeak. Dantza emanaldiaren ondotik, pintxoak eskainiko dizkiete herritarrei Xalto eskolako aterpean.
Urtero ospatzen du Umore Ona elkarteak atalen eguna. Iaz, koronabirusak eragindako osasun larrialdiagatik bertan behera utzi zuten elkartearen jardun osoa, eta baita atalen eguna bera ere.