Elikadura sistema eta nekazaritza ekoizpen iraunkorra dute begiz joa, eta horri heldu nahi dio hurrengo hamarkadan Etxalde nekazaritza iraunkorraren eta elikadura burujabetzaren aldeko mugimenduak. Bide horretan, udalaren laguntzarekin, hitzaldiz, mahai-inguruz eta eztabaidaz hornitutako jardunaldia antolatu du Etxaldek Leitzan. Ostegun honetan, urriaren 28an, izanen da eta goiz osoko egitaraua prestatu dute Herri Aretoan. Hizlari guztiak Etxaldeko kideak izanen dira.
Egitaraua
- 10:30ean, Gotzone Sestorain herritarrak ongietorria eginen du eta txostena aurkeztuko du, zergatiak eta helburuak azalduz.
- 10:45ean Mikel Hiribarren laborariak testuinguru orokorra azalduko du: nazioartea, Euskal Herrian, Covid-19a, elikadura sistemak, nekazaritza...
- 11:05ean Bizkaiko EHNEko Andoni Gartziak hartuko du hitza eta Europako Batzordearen proposamena, Baserritik mahaira estrategia eta NPB dirulaguntzak Europa eta Euskal Herrian nola dauden kontatuko du.
- 11:25ean Amets Ladislaoren txanda izanen da eta Baserriratze prozesuak lehentasunezko helburua, eta elikadura politika publikoen ardatz egituratzaile gisa gaiaren bueltan ariko da.
- 11:45ean publikoak hartuko du hitza eta 12:15ean atsedenaldia eginen dute.
- 12:30eko mahai-inguruarekin berrartuko dute saioa, Gotzone Sestorain moderatzaile dutela. Lau hizlarik parte hartuko dute mahai- inguruan eta horietako bakoitzak 20 minutuko tartea izanen du.
- Miriam Otxotorena NPEK-eko lehendakaria, esaterako, 2030 urterako lurren % 25 ekoizpen ekologikokoa izateko, plagizida eta antibiotikoen erabilera % 50 murrizteko eta ongarri kimikoak % 20 gutxiago izateko erronkari begira jarriko da.
- Alberto Llona EHNEko teknikariak, berriz, Abeltzantza eta ekoizpen eraldaketak, Europako herrialdeetako tendentziak, merkaturatzea eta kontsumoa izanen du hizpide.
- Esti Besa ardo ekoizleak ardogintzaren ibilbidean oinarrituta, jatorrizko izendurez, kalitate politikez, lehentasunezko merkaturatze estrategiez eta barne merkatua egonkortzeaz hitz eginen du.
- ELB sindikatuko Panpi Sant Marik, azkenik, borroka eta aldarrikapenak ekarriko ditu erdigunera: Borroka eta aldarrikapena ezinbesteko osagaiak oinarrizko baliabideak bermatzeko, herritargoarekin konplizitateak eraikitzearen garrantzia izanen du hizpide. Horretarako, ahateen afera eta nekazaritza lurren defentsa izanen ditu abiapuntu.
- Mahai-inguruaren ondoren, 13:50ean eztabaida irekia eginen dute publikoaren eta mahaikideen artean.