Mikel Zabaleta Leitzako alkatearekin batera, Berastegi, Larraun eta Lizartzako udal ordezkariak bildu ziren atzo Uli mendian. Gogoratu zutenez, «duela zazpi mende gure arbasoak urtero biltzen ziren Uliko leku honetan, tregoak egiteko, akordioak lortzeko eta bakeaz hitz egiteko, gaur egiten ari garen moduan».
«Iragana etorkizunaren zati bat dela» adierazi zuten, «horregatik gaude hemen, beti izan garena izaten jarraitzen dugulako, inolako mugarik markatzen ez duen herri baten bi aldeetako anai-arrebak». Gisa berean, «duela mende asko bezala, gaur egun ere denok nazio bereko herritarrak garela» aldarrikatu zuten, «anai-arrebak garela eta hau ez dela 'mugako lurraldea', ezta 'gaizkileen muga' ere, euskararen gunea baizik, milaka urtez guztion elkarbizitzarako habia, hain zuzen».
Horrekin batera, «ulermen protokoloa» sinatu zuten, «kultura eta gizarte-ongizate proiektuaren, eta oro har, bizilagunen bizi baldintzak hobetzen dituzten eta gure eskualdeko herri eta haran guztien adiskidetasuna eta bizikidetza sustatzen lagunduko duten proiektuetan lankidetzan jarduteko borondatea» adieraziz.