LHL erronkari esker, aste emankorrak izan dituzte Leitzan eta tarte horretan, sentsibilizazio kanpaina sendoa egin eta elkartasun mezu ugari hartu dituzte, herri lan-sare indartsua sortu dute, plazarako sarbidea edonoren esku jartzea lortu dute, zebrabide koloretsuak margotu dituzte ikusgarriago egiteko, komertzioetan piktogramak jarri dituzte, antzerki solidario espaziala eta film laburrak ikusgai jarri dituzte, goi mailako kirolari buruzko mahai ingurua antolatu dute, inklusibitatearen mezua zabaltzeko murala margotu dute, udalak aniztasun funtzionala dutenentzako aparkalekuak margotu ditu...
Eta orain, kirol erronka da gelditzen dena. Gogotik entrenatu ondoren, Iraitz Uriarte eta Iker Gomez ostiralean, ekainaren 25ean abiatuko dira Linzatik. 12:00etan egina dute abiatzeko hitzordua, eta biharamunean, ekainaren 26an, arratsaldean, Leitzara iritsiko direla aurreikusi dute.
Bidean, ordea, zati batzuetan hainbat bidelagun izanen dituzte. Herriko gazte edo LHLko kideek bat eginen dute beraiekin korrika, eta aldarrikapenek ere izanen dute lekua. Kemen taldekoek aulki berezi batzuekin naturaz eta mendiaz gozatzeko aukera eskaintzen diote bestela ezin izanen lukeen jendeari, eta Artesiaga eta Belateko mendateen arteko zatia Gomez eta Uriarterekin batera eginen dute. Haiekin batera, Gorka Zubeldia alegiarra ere ondoan izanen dute, belaunetik behera hanka moztua du eta protesi batekin korrika egiten du.
Kirol erronkaren ondoren, igandean, azken aldian saldu dituzten txartelen zozketa eginen dute. Hainbat lote banatuko dituzte.
Ikusi hemen ibilbidea
ABIATZEKO PUNTUA | ABIATZEKO ORDUA | HELMUGA PUNTUA | HELMUGA ORDUA | DISTANTZIA |
Linza | 12:00 | Belaguako aterpea | 16:30 | 23 km |
Belaguako aterpea | 17:00 | Abodi | 20:00 | 17 km |
Abodi | 20:45 | Aezkoa | 00:30 | 17 km |
Aezkoa | 00:30 | Auritz | 04:00 | 17,5 km |
Auritz | 04:00 | Urkiaga | 07:30 | 17,5 km |
Urkiaga | 08:00 | Artesiaga | 09:45 | 9,5 km |
Artesiaga | 10:30 | Belate | 13:00 | 10 km |
Belate | 13:30 | Gorostieta | 16:30 | 16 km |
Gorostieta | 16:30 | Leitza | 19:30 | 16 km |