Iñigo Gutierrez (Algorta) eta Maria Lizarraga (Burlata) presoen alaba da Izadi. Valentzian jaio zen eta egun Aranjuezko espetxean bizi da. Bere egoera salatzeko eta «Izadik askatasunean, bere gurasoekin, bizi behar duela» aldarrikatzeko sortu zen 'Izadi gurasoekin etxera' plataforma.
Leitzako Torreak plataformarekin bat egin nahi izan du, «haur bezala eskubideak urraturik dituen enegarren haurra» delako Izadi: «ezin gurasoekin askatasunean hazi, ezin elikadura orekatu eta osasuntsua mantendu, ezin bere inguruan hazi, ezin bere senide eta gertukoekin ohiko harremanik izan...». Bizi duen egoeragatik, «borroka, aldarrikapen eta ospakizunekin» bat egin du Torreak.
Miru sorginaren emanaldia eta argazkia
Datorren larunbatean, ilbeltzaren 23an, Izadiren bigarren urtebetetzea ospatzeko deialdia egin dute. «Haur, gazte nahiz helduak» festara gonbidatu dituzte eta, edukiera mugatu eta segurtasun neurri guztiak betetzeko, gonbidapenak gaurtik aurrera eskuragarri jarri dituzte Torrean bertan.
Aurreratu dutenez, 17:00etan Miru sorginaren emanaldia izanen dute eta ondotik zorion abestia abestu, argazkia atera eta txokolate beroa hartuko dute. Inauterietako egunak izan beharko luketenez, mozorrotuta joateko deia egin dute.