Aurten Kikili Saldak lehenengo gosaldu, ondoren eguna dastatu kanpaina abian jarri du. Kanpainaren helburu nagusia gosaltzearen eta, batez ere, osasuntsu gosaltzearen onurez sentsibilizatzea da. Izan ere, NUPeko IS FOOD institutuak egindako ikerketa baten arabera, 8 eta 12 urte bitarteko haurren %13ak ez du gosaltzen eta datu hori oso kezkagarria denez, kanpaina egiteko beharra ikusi da. Horretarako ekintza ugari jarri dituzte martxan:
- Erleta eskolako, Xalto eskolako eta Nazabal eskolako Haur Hezkuntzako eta Lehen Hezkuntzako ikasle guztiei gosaltzeko katilu bana oparitu zaie.
- Adin txikikoen ohitura osasungarriak bultzatzeko eta haurren obesitatea murrizteko gurasoei esku-orriak banatuko zaizkie.
- Herri mailan, intereseko leku publikoetan eta kalean gosaltzearen onurak eta nola gosaldu adierazten duten kartelak ezarri dituzte.
Kikili Saldak adierazi duenez «gosaltzeak metabolismoa aktibatzen, arreta, poztasuna eta umorea mantentzen, energia gehiago izaten eta otordu orekatuagoak eta osasungarriagoak bideratzen laguntzen du». Horrez gain, «obesitatea, kolesterola, bestelako arazo kardiobaskularrak, nekea, pasibitatea eta antsietatea bezalako egoerak saihesten» laguntzen duela gaineratu dute.
Kanpainaz gain, 2020-2021 ikasturtean bestelako ekintza batzuk ere abian jarri dituzte:
- Haur hezkuntzako geletan elikaduraren eta ekintzen inguruan hausnarketa bideratzeko elikaduraren eta ohituren semaforo joko didaktikoa.
- Kikili Saldako kide batzuek martxoan Ordiziako D'elikatuz interpretazio zentrora bisita egin zuten.
- Amazabal Institutuko ikasleek Kikili Saldaren logo berria sortu zuten.