Pandemiak eragindako zazpi hilabeteetako etenaren ostean, larunbatean jokatu ziren jokatzeke gelditzen ziren Bardoetako bi finalaurrekoak, Goizuetan eta Jauntsaratsen. Behin bi saio horiek eginda, argitu da urriaren 17an, Lizarran, finalean ariko diren taldeen zerrenda: Leitzako Atekaberts komeni taldeari -lehendik sailkatua- Malerrekako Bertsonautak eta Berako Lamixene taldeak gehitu zaizkie.
Goizuetan, udaletxeko ganbaran jokatu zen finalaurrekoetako bat. Aforoa murriztuta eta aulkien artean distantzia utzita ere, 60 lagun inguruk jarraitu zuten saioa bertatik bertara, giro onean. Parean izan ziren Lesakako Arranopola eta Malerrekako Bertsonautak taldeko bertsolariak -Eneko Fernandez, Erika Lagoma, Etxahun Azkarraga eta Josu Sanjurjo lesakarren taldean, eta Alazne Untxalo, Egoitz Gorosterrazu eta Iker Gorosterrazu Malerrekakoan-, Estitxu Arozena gai-jartzailearen aginduetara kantuan. Joaneko saioan, otsailean Anizen jokatutakoan, garaipena eskuratu zuten Bertsonautak taldekoek, eta beste horrenbeste egin zuten Goizuetan, finalerako sailkapena ziurtatuz.
Jauntsaratsen (Basaburuan) izan zen ortziraleko beste finalaurrekoa, Apeztegiberriko ganbaran. Han ere bermatu ziren segurtasun neurri guztiak, eta 50 lagunen aitzinean kantatu zuten Berako Lamixene eta Barañaingo Hego Haizea taldekoek. Beratarren partetik, Aitor Elexpuru, Julen Zelaieta eta Patxi Castillo aritu ziren bertsotan. Barañaindarren aldetik, berriz, Ainara Ieregi, Ander Baiano, Endika Legarra, Iñigo Aranguren 'Pika' eta Sahats Aleman. Gai-jartzaile lanetan Ainhoa Larretxea aritu zen. Beratarrek irabazia zuten joaneko saioa, martxoan Tafallan egindakoa, eta ortziralean ere nagusitu ziren, finalerako txartela berretsiz.
Finala, urriaren 17an
Horrenbestez, argitu da urriaren 17ko finalean ariko diren taldeen zerrenda. Leitzako Atekaberts komeni taldeak lehendik zuen sailkapena ziurtatua, pandemiaren aurretik jokatu baizuen bere sailkapen kanporaketa. Orain, zehaztu dira bertze bi talde finalistak ere.
Lizarrako Ikastolan eginen da finala, segurtasun eta osasun prebentziorako neurri guztiak bermatuta. Urriaren 17an izanen da, 17:00etan. Sarrerak salgai daude honezkero, www.bertsosarrerak.eus atarian online, eta fisikoki, Lizarra Ikastolan bertan.
Ttipi Txarteldunen eta Ttipi-Ttapa aldizkariko harpidetza ordaintzen dutenen artean ere finalerako 2 sarrera bikoitz zozketatuko dira. Horretarako erra.eus webgunean ageri den formularioa bete behar da urriaren 8ra bitarte eta urriaren 9an jakinaraziko dituzte saridunak.