Leitzako osasun etxean egindako PCR probetan positiboak «ugaritzen» ari direla ikusi dute eta adierazi dutenez, «gehienak aisialdi, lagunarte eta familia giroan» antzeman dituzte. Hori horrela, dagokion protokoloa martxan paratu dute eta «birusaren jarraipen estua» egiteko lanean ari dira.
Hala, sintomak dituztenei (sukarra, eztula, arnasa hartzeko zailtasuna, usaimena eta dastamena galtzea, beherakoa, giharretako mina, ezohiko eztarriko nahiz buruko mina) edota kutsatuta dagoen norbaitekin hurbileko kontaktua izan dutenei (bi metro baino hurbilago eta babes neurririk gabe) osasun etxera deitzeko deia egin diete: «PCR proba egin behar duten erabakitzeko». Goizeko lehenbiziko orduan deitzeko eskatu dute: «lana ongi antolatu eta egin dezan». Kontsulta itxita dagoen kasuetan 948 29 02 90 telefonora edo 112ra (premiazkoa bada) deitzeko adierazi dute.
Horrekin batera, «birusa ez dela desagertu» argitu dute: «osasuna eta segurtasuna bermatzeko orain arte ezarri diren neurriak eta eman diren gomendioak zorrotz betetzen jarraitu behar dugu».