Goizuetako lurretan dago Artikutza, baina Donostiako Udalak 1919an erosi zuen. Hain zuzen, aste honetan jakinarazi du Donostiako Udalak pandemia dela eta, bertan behera utzi duela urtero San Agustin Egunean Artikutzan libreki sartzeko ematen duen baimena. San Agustin egunean bakarrik sartu ahal izaten da Artikutzan baimen ofizialik gabe, baina, aurtengoan, urteko egun arrunt batean dauden baldintza berberak bete beharko dira: gehienez 25 ibilgailu eguneko.
Horrekin batera, Donostiako Udaletik adierazi dutenez, «Artikutzan sartzeko baimena duten bisitariek ezin izanen dute 10 lagun baino gehiagoko taldetan bildu, musukoarekin ibili beharko dute, elkarren arteko distantzia errespetatu eta eskuak garbitu». Hala ere, emandako abisuari kasurik ez egin eta Artikutzan baimenik gabe jendetza elkartuko balitz, «Foruzaingoari laguntza eskatzea aurreikusia» dutela gaineratu dute.