Istripua asteazken arratsaldean gertatu zen Kaxarnan, Latasako eskalada-eremu ezagun batean. Lagun taldea eskalatzen ari zenean, neurri handiko arroka bat askatu eta belaunean jo zion Leitzako mendizaleari, eta kolpe gogorraz gain zauri sakona eragin zion.
Istripuaren ondorioz eskaladaren erdian gelditu zen zauritua, bere kabuz jaisteko gauza ez zela. Hori dela eta, suhiltzaileen Erreskate Teknikoko Taldekoak bertaratu ziren, erreskatea oso leku aldapatsu eta harritsuan zegoelako eta, horrek, ebakuazioa asko zaildu zuen. Horrela, bada, bi ordu inguruz suhiltzaileen erreskate taldeak, gainerako eskalatzaileen eta bertaratutako anbulantziako langileen laguntzarekin, gogor aritu ziren zauritua jaisteko.
Azkenik, zauriak oso larriak ez ziren arren, zauritua Nafarroako Ospitalera eraman zuten anbulantzian.