'Lur eta amets: hau bai abentura!' filma ikusgai ostegunean Leitzan

Euskal Herriko historiari errepasoa egiten diote protagonistek abentura ikusgarri batean.

Leitzako Torrea tabernak antolatutako Ostegunak bizi bizi egitasmoak haur eta gaztetxoei zuzendutako eskaintza dakar aste honetan. Uztailaren 30ean 21:30etik aurrera Lur eta Amets: hau bai abentura! filma proiektatuko dute karrapean. Sarrerak Torrean eskura daitezke 4 euroren truke. Iluntzea bereziagoa izan dadin taloak ere jarriko dituzte salgai Torrean.

2019ko abenduan aurkeztu zuten Durangon Lur eta Amets: hau bai abentura! filma eta otsailetik aurrera, zinemetara salto egin eta Euskal Herrian barna itzulia eginez ere eskaintzeko asmoa zuten. Koronabirusa tarteko, ordea, ez dute toki askotan eskaintzerik izan eta horregatik Leitzakoa estreinaldia dela esan daiteke.

Sinopsia
Lur eta Ametsen gurasoek asteburu honetan ezkontza dute eta bikiak amona Andereren etxean utzi dituzte asteburu pasa. Baina Andereren eta bere katu Baltaxarren botereei esker, ez da asteburu arrunta izango. Bidaia batean murgilduko dira, garai eta sasoi desberdinetan abentura gazigozoak bizituz, gure historian zehar bidaiatuko dute. Beti izango dira beraiek protagonistak, Andere eta Baltaxarren laguntza ordaingabearekin. Baina, tamalez, gaiztoak, sasoi eta garai desberdinetan, ia beti izango dituzte atzetik. Abenturaz abentura ibiliko dira Lur, Amets, amona Andere eta Baltsaxar katua Euskal Herria eta bere historiako hainbat garai eta gertaera ezagutuz.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun