Maiatzaren 9an egin zuten Leitza eta Aresoko baserritarren aurreneko azoka. Geroztik, larunbatero izan dute ekoizleek eta erosleek hitzordua karrapean Baserritik etxera dinamikari segida emanez. Aldiro ehun pertsona baino gehiago bildu dira azokan, aurretik egindako eskaerak biltzera batzuk eta momentuan bertan erostera besteak.
Ekimen bereziak
Udan ere, segida izanen dute azokek. Uztailaren 25ean izanen da hurrengoa eta abuztuan eta irailean astero egin beharrean hamabostean behin antolatzea erabaki dute. Hortaz, abuztuaren 1ean eta 22an eta irailaren 5ean eta 19an eginen dute. Azokak girotzeko ekimenak antolatzen ere segiko dute. Orain artekoetan, Jakoba Errekondoren kontsultategia eta bertako produktuekin ekoiztutako pintxoak dastatzeko aukera izan dute.
Leitzako eta Aresoko hamabi baserritarrek eramaten dituzte beraien produktuak azokara: barazkiak, lekaleak, etxean prestatutako jakiak, haragiak, esnekiak... nahi duen orok izanen du eskuratzeko aukera karrapean 10:00etatik 12:30era.