Irungo arrain haztegian ugaltzen dira bildutako izokin basatiak. Eta Foru Aldundiaren arabera, «dagoeneko nabariak dira birpopulatze ekimen honek eman dituen fruituak». Urumean, erraterako, «azken hamar urteotan, batez beste, 181 izokin sartu dira urtero».
Izokin atlantiarra Kantauri isurialdean espezie nahiko arrunta izan zen XIX. mendera arte. Gero, ordea, «industrializazioaren eraginez, urararen kutsaduragatik eta han eta hemen eraikitako presen eraginez, Euskal Autonomia Erkidegoan guztiz desagertu zen, Bidasoan izan ezik. Urumean, berriz, 1940 inguruan desagertu zen». Egoera horri buelta eman nahian, «izokin basatien populazio iraunkorra bermatzeko eta populazio handitzeko» lanean ari da Gipuzkoako Foru Aldundia, hala nola, birpopulatzeko ekimen horrekin batera, ibaietan izokin arrainkumeen populazioa ikertuz eta zenbait tokitan izokin helduen sarrera aztertuz. «Izokinen habitata hobetzeko» bestelako neurriak ere hartu izan dituztela jakinarazi du, hala nola, «presak eraistea, arrain eskalak eraikitzea, ur-emari ekologikoak bermatzea...».