Alarma egoerak, Espainiako Auzitegi Gorenak kontuak enbargatu izanak eta lokala konfiskatzeko mehatxuak egoera berezian utzi zuen Leitzako Torrea taberna. Orain, berriz ere, martxan hasteko garaia dela adierazi dute: «herriarena den espazio hori berriro bizi eta egitasmoz betetzeko hautua egiten dugu». Taberna irekitzearekin batera, euskal kulturako sortzaileen sostengu eta bidelagun izaten segiko asmoa dutela ere azaldu dute eta horretarako sortu dute Ostegunak bizi bizi ekimena. Ostegunero, 19:00etatik aurrera, kontzertuak, emanaldiak... antolatuko dituzte. Uztailaren 16an Joseba Irazokiren kontzertuarekin hasiko dute kontzertu erronda eta uztailaren 23an Abereh taldea zuzenean entzuteko aukera izanen da. Sarrera bost euro ordaindu beharko da.