2018an jaso zuen Aresoko Udalak Mendialdea Mankomunitatearen eskutik eskaintza: «konposta egiteko planta bat sortzeko asmoa dute eta lur zati bat eskatuz etorri ziren». Bi urte pasa dira, udal taldea aldatu da eta eskaintzarekin aurrera edo atzera egiteko unea iritsi denean, egungo ordezkariei hainbat zalantza sorrarazten dizkie gaiak. Gisako proiektu bat gertutik ezagutzeko asmoz, Irunberriko konpost-planta ikustera ere joan ziren udaleko hainbat ordezkari: «baina bisita honek ez zizkigun zalantzak argitu». Hala azaldu dute etxez etxea banatu duten gutunean: «ez dakigu konpost-planta batek inguruan zein eragin izan ditzakeen usain eta itxura aldetik, kaltegarria izan ote daitekeen ondoan dauden enpresentzat edo aurrerantzean lur zati bat saltzerako orduan». Izan ere, konpost-planta industrialarean erdialdean egongo litzateke, «beste enpresengandik oso gertu». Industrialdean bertan baina beste eremu batean egitea ere eskaini diote mankomunitateari: «traba asko ikusten dizkiote, nahiz eta ezinezkoa ez izan».
Konpost-plantaren erabilerak ere zalantzak sorrarazten dizkie, herritarren hondakinak ez lirateke bertara eramango, «hasiera batean, sortzaile handiek soilik eramango lukete plantara konposta. Etxeetakoek auzo konpostarekin jarraituko lukete».
Diru sarrera
Eluseder industrialdeko lur sail bati irteera eman eta diru sarrera bat lortzeko bidea izan daiteke, ordea, Mendialdea Mankomunitateak egindako eskaintza. Bere garaian industrialdea eraikitzeaz arduratu zen enpresak ezin izan zituen lanak bukatu arazo ekonomikoengatik eta bertan inbertitutako diruaren zorraren zati bat udalak hartu zuen bere gain: «horri aurre egin nahian gabiltza azken urteetan».
Balantzan alde batera edo bestera egiteko, herritarrek nahi dutena kontuan hartu nahi dute: «konpost-planta egitea nahi duten, BAI edo EZ esan beharko dute herritarrek». Udalera gerturatu eta iritzia ematera animatu dituzte hamasei urtetik gorako herritar guztiak.