Larunbatetan Leitzaldeko ekoizleen azoka antolatzea erabaki dute ‘Baserritik etxera’ dinamikari segida emateko

Larunbatero plazan eginen dute produktuen trukea bezeroekin Leitzako eta Aresoko ekoizleek.

Maiatzaren 9tik aurrera Baserritik etxera dinamikak salmenta bidea aldatuko du. Orain arte bezala katalogo bat osatuko dute,  hilabetero berrituko dute eta astero eginen dute produktuen eskaintza, baina ostiraletan etxeetara banatu beharrean banaketa larunbat goizetako Leitza eta Aresoko ekoizleen azokan eginen dute. Gainera, erreserbatutako produktuak jasotzeaz gain, momentuan bertan salerosketarako aukera izanen dute.

Apirilaren 21ean Nafarroako Gobernuak salmenta zuzenerako neurriak malgutu izanak salmenta bidea egokitzeko aukera eman die Leitzaldeko baserritarrei. Hala, baserritarrak erreserbatutako produktuak hartu eta plazara joanen dira larunbat goizetan. Erreserba egin duena bertaratuko da produktuak jaso eta ordaintzera. Gainera, produktuak unean bertan erosteko aukera ere izanen dute eskaerarik egin ez dutenek edota momentuko eskaintza ikusita baita produktu gehiago eskatzekoa ere; azoka baten tankeran. Honetaz gain, orain arte bezala, erosle eta baserritarrak ere adostu dezakete beraien artean beste bide bat.

Elkarlanaren emaitza
LeitzEKO kontsumo taldea, Leitzako Udala, Herritarren Laguntza Sarea eta Leitzako eta Aresoko ekoizleak elkarlanean ondu dute Baserritik etxera dinamika. Apirilaren 24ra arte herritar boluntarioek osatutako sarea arduratu da etxez etxeko banaketa egiteaz. Handia izan da dinamikak lortu duen arrakasta: lau astez 211 eskaera izan dituzte, 116 erabiltzaile ezberdinek eginak (45 urtez azpikoak) eta bertan ekoiztutako 1.277 kilo elikagai banatu dituzte.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun