Koronabirusaren aurrean «zuhurtziaz» jokatzeko deia egin du Leitzako Udalak

Ttipi-Ttapa 2020ko mar. 13a, 16:16
Udalak antolatutako jarduera guztiak bertan behera utzi dituzte eta familien txokoa, liburutegia... itxi dituzte.

COVID-19 edo koronabirusaren hedapenak eragindako egoera dela eta, osasun erakundeek ezarritako irizpideekin bat eginez, Leitzako Udalak gaixotasunaren hedapena saihesteko neurriak hartu ditu.

Alde batetik, Udalak antolatutako jarduera guztiak bertan behera utzi ditu, «baita udal instalazioetan burutzen diren jarduera guztiak, familien txokoa eta liburutegia ere». Kirol instalazioak, haur eskola, Okile tailerra eta liburutegia itxi ditu eta ostiraleko azoka bertan behera utzi du. Horrez gain, herritarrei kontsultak «telefonoz edo elektronikoki» egitea eskatu die (leitza@leitza.eus helbidera idatziz edo 948 51 00 09 telefonora deituz).

Azkenik, garbitasun neurriak zorrozteko eta sukarra edo arnas falta sumatuz gero 948 29 02 90 telefonora deitzeko deia egin dute. Etxetik ateratzeko beharra izanez gero, «leku irekietan» ibiltzeko deia egin dute, «beste pertsonekin harremana saihestuz, bi metroko distantzia mantenduz».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun