Leitzako plazatik goizeko 11:30ean abiatu zen kalejira, txistulariek eta trikitilariek girotuta. Leitzako Herri Areto ondoan egin zuten lehenbiziko geldialdia eta bertan, jarri zuten lehenbiziko plaka: Mikaela Labaien Lasarteri eskainitakoa. Herrian barna ibilbidea osatuz, Pilar Lasarte Zubiturri, Miren Otermin Gaztañagari, Emakume baserritarrei eta Naiara Perurena Aizkorberi eskainitakoak jarri zituzten gero.
Ione Gorostarzu idazleak eskainitako hitzen eta Ane Intxausti bertsolariak abestutako bertsoen bidez, sei emakume horien bizitzari buruzko informazioa eman zuten. Gizarteko oztopo, aurreiritzi, trabak... gaindituaz maite duten hori eginez bidea osatu duten emakumeak dira guztiak eta martxoaren 8a baliatuta, omenaldia eta aitortza egin zieten.
Plazan bukatu zuten kalejira, olerki ederrak errezitatu eta borobilean bilduz. Bertan bildutako emakume askok Atekabeltz herrigunean bazkaldu zuten gero giro ederrean. Bazkalosteko akelarrean ere denetarik izan zuten, abesti feministekin egindako bingo musikatua, poesia errezitaldi labur bat, femi-rol playing antzerki txikiak, aulki jokoa eta dantzaldia.