Kaxkabeltza elkarteko kideek XII. Stock Azoka eginen dute martxoko bigarren asteburuan. Elkarteko sei komertziok parte hartuko dute azoka berezian, udazken-neguko salgaiak beherapen bereziekin plazaratuz. Hain justu, Kulunka haurrentzako arropa eta oinetako denda, Leitza Kirolak, Garbi lurrindegia, Bi pauso oinetakoak, Biok jantziak eta Kapritxo arropa eta osagarri denda izanen dira azokan parte hartuko dutenak.
Amazabal pilotalekuan
Eguraldiaren arabera, azken orduan, zehaztu izan dute aurreko txandetan azokaren kokalekua, baina oraingoan zuzenean Amazabal pilotalekuan egitea erabaki dute. Larunbatean 10:00etatik 19:30era eta igandean 10:00etatik 14:00etara eginen dute azoka. Azokako erosleak saritzeko asmoa ere badute antolatzaileek. Kaxkabeltzak Elkarteko komertzioetan saltzen dituzten produktuekin saski eder bat osatu dute eta erosketak egiten dituztenen artean igande eguerdian zozketatuko dute. Zozketan parte hartzeko beren izena eta telefonoa idatzi beharko dituzte txarteltxo batean eta kaxa batean sartu.