Taldekako lehiaketa
Antolatzaileek hemezortzi urtetik gorako herritar guztiei luzatu diete erronka: «Leitza ezagutzen duzula uste baduzu eta ongi pasa nahi baduzu parte hartu ezazu». Aurreko edizioetan bezalaxe, taldekako lehiaketa izanen da eta taldeek hiru pertsonakoak izan beharko dute. Otsailaren 10ean ireki zuten izena emateko epea eta otsailaren 28ra arte egonen da zabalik. Interesa dutenek Euskara Zerbitzuan, 948 51 08 14 telefonora deituta edo laga@iparmank.eus helbidera idatzita edo Karrape Irratian, 948 61 09 14 telefonora deituta edo karrapeirratia@gmail.com helbidera idatzita eman dezakete izena. Gero, izena ematen duten talde guztien artean zozketa egin eta lau hautatuko dituzte. Lau horiek izanen dira apirilaren 3an oholtzara igoko direnak.
Galderak, ariketak eta hainbat berrikuntza
Leitzari buruzko galderak erantzun, ariketa bereziak osatu... eta proba berriak ere prest dituztela azaldu dute antolatzaileek, «parte hartzaileek zein ikusleek primeran pasatzeko aukera izanen dute».
Sariak denentzat
Parte hartzaileak ez dira etxera esku hutsik joanen. Irabazleek 450 euroko txekea eskuratuko dute eta horretaz gain, parte hartzaile guztien artean sari ederrak banatuko dituzte: kultur ekitaldietarako sarrerak, herriko produktuak...