Iaz eskaini zuten estreinakoz lasterketa erreleboka egiteko aukera emakumeen parte-hartzea sustatzeko asmoz. Euskal Herria Mendi Erronka lasterketaren ibilbide berdina osatu beharko dute lasterketa, baina bikoteka erreleboetan egin ahal izanen da, bietako batek, gutxienez, emakumea izan behar duelarik. Lehenengo lasterkariak irteera puntutik Putzuzarreko anoagunerainoko zatia eginen du. Putzuzarren erreleboa eman beharko dio bikoteari eta bigarren horrek Putzuzarretik Leitzako helmugaraino geratzen den zatia osatu beharko du.
Tarifak
Apirilaren 4ra arte bakarka izena ematen dutenek 56 euro ordaindu beharko dituzte eta maiatzaren 16ra arte 66 euro. Erreleboka parte hartu nahi dutenek, berriz, 75 euro edo 85 euro. Aurten Euskal Herria Mendi Erronka lasterketa bukatzen duten guztiek 3 puntu lortuko dituzte Ultra Trail Mont Blanc-en parte hartzeko. ITRArako ere puntuagarria izanen da EHME lasterketa.
Lasterketa baino gehiago
Kirol ekitaldi hutsaz gain, aldarrikapena ere oinarrian daraman lasterketa da. Izan ere, mendi lasterketa eta euskal mendizaletasuna sustatzeaz gain, euskal selekzioen ofizialtasuna, Mendialdea-Aralarko inguruaren garapena (Araitz-Betelu, Larraun-Lekunberri eta Leitzaldea), euskararen sustapena, lurraldetasuna edo ingurugiroaren babesean eragitea ere hasieratik antolatzaileek euren buruari jarritako erronka bihurtu ziren.
