Eguberriak 2019

Etxez etxe opariak banatu dituzte errege magoek Areson

Zintzarrien bueltan urduritasuna. Horixe bizi izan zuten Aresoko haurrek urtarrilaren 5ean. 16:00 aldera herri guztia dantzan jarri zuten herriko txikienek, zintzarriak astinduz erregeak herrira iristeko gutxiago falta zela iragarriz. Iluntzerako, ordea, kaleak hutsik ziren. Norbere etxean, erregeekin batera zintzarriak joz ibili ziren herriko gazteak aditzeko zain ziren guztiak. Iluntzean, 18:00 aldera, iritsi ziren hiru erregeak eta pajeak herrira eta etxez etxe ibili ziren opariak banatzen.

Opariak jaso soilik ez, besteei laguntzeko ere baliatu dituzte Eguberriak aresoarrek. Abenduaren 24an kantu eskean ibili ziren eta 365,05 euro bildu zituzten. Herritarrek emandako diru hau, gaixotasun arraro baten ondorioz, behar bereziak dituen zonaldeko ume bati laguntzeko erabiliko dute. Guraso Elkarteko kideek eskerrak eman nahi dizkiete dirua eman zuten herritarrei baita kantuan atera ziren guztiei ere.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun