Hitzordu hirukoitza prest dute larunbaterako Aranon

Ttipi-Ttapa 2019ko abe. 26a, 10:11
Atopia rol jokoan aritzeko aukera izanen dute afalondoan. Hiru aranoarrek parte hartu dute joko honen sorkuntzan.

Arratsaldetik gauera bitarteko plana osatu dute abenduaren 28rako Aranon. Napardeath filma ikusi, lagunartean afaldu eta Atopia rol jokoan aritzeko gonbidapena egin dute. Euskarazko aurreneko rol jokoa da Atopia eta egileen artean daude Ohiana Calparsoro, Nerea Ansa eta Unai Gorrotxategi aranoa­rrak.

Maisuenean, 19:00etan hasiko da Napardeath filmaren emanaldia. Gainera, ber­tan izango da Beñat Iturriotz zu­zendaria, peli­kulako beste hainbat parte-hartzaile­re­kin batera; hala, solasaldirako tartea izanen dute pelikula ikusi ondotik. Gero, afaria eginen dute eta afalondoan Atopia rol jokoan ariko dira.

Atopia

Gerediaga elkarteak emandako Sormen Beka jaso zuen Atopia RPG proiektuak pasa den urtean. Abenduan kaleratu dute elkarlanean osatutako lana. Atopia RPG rol joko bat da eta, aldi berean, liburu bat. Bertan, askotariko istorioak, ipuinak eta ilustrazioak aurki daitezke, den-denak Euskal Herri alternatibo batean oinarritzen direnak.

Kultura Leitzaldea Arano

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun