50. urteurreneko ospakizunak prest ditu larunbaterako Erleta Eskolak

Ttipi-Ttapa 2019ko aza. 19a, 17:00
Erletako historia argazkitan bildu dute eta pasilloak apaintzeko erabiliko dituzte.

Eskola bisitatzeko aukera emanen dute eta bazkaria, dantza emanaldia, pilota partidak eta kantaldia ere izanen dituzte

Azaroaren 23an 50. urteurreneko pesta ospatuko dute Erleta Eskolan. Hain juxtu, mende erdia bete baino egun bat lehenago,1969ko azaroaren 24an ireki zituen-eta ateak eskolak.
Bertako ikasleek, guraso elkarteko kideek eta udalak elkarlanean antolatutako pesta izanen da eta herriko jende askok bertan ikasi duenez, denei luzatu nahi izan diete pestan parte hartzeko gonbidapena. Goizean, 10:30ean irekiko dute eskola eta pasilloetan jarriko dituzten argazkiak ikusiz eskolako historian atzera egiteko aukera izanen da. Gero, dantzariek saioa eskainiko dute eta pilota partidak ere izanen dira. Bi ekitaldiak Aurrera Elkarteko kideen laguntzarekin antolatu dituzte. Gero, bazkaria izanen dute eskolako jangelan (txartelak eskolan bertan, Maimurren eta Astizen jarriko dituzte salgai). Bazkalondoan guraso elkarteak antolatutako jokoak  izanen dituzte eta bukatzeko Olaia eta Irati aresoarrek kantaldia eskainiko dute. Elkarlanean prestatutako pesta, elkarrekin gozatuko dute. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun